Friday 17 January 2014

~ മഞ്ഞു പെയ്യുന്ന ഒരു രാത്രിയില്‍ ~


ഭാഗം 1 !!

-----------

നിര്‍ത്താതെയുള്ള ഫോണ്‍ വിളിയാണ് അന്നെന്നെ ഉണര്‍ത്തിയത്...
ടേബിള്‍ ലാംബ് ഓണ്‍ ചെയ്ത് സമയം നോക്കി.. ഒന്നര മണി .

ഫോണ്‍ വീണ്ടും റിംഗ് ചെയ്ത് തുടങ്ങി...

അരുള്‍മണി ആണ്.. കമ്പനിയിലെ തമിഴ്നാട്ടുകാരന്‍ എന്‍ജിനീയര്‍.

അറ്റന്‍ഡ് ചെയ്തു..

എന്നടാ...അരുള്‍...എന്നാച്ച്‌?..

അണ്ണാ , നാന്‍ എയര്‍പോര്‍ട്ടില്‍ നിന്ന് വന്തിട്ടിരുക്ക്..ഇന്ത ടാക്സി ഡ്രൈവര്‍ക്ക് എവ്വ്ളവു സൊല്ലിയിട്ടും നമ്മ അക്കോമഡേഷന്‍ ഏരിയ പുരിയമാട്ടിങ്കിത്..നീങ്ക കൊഞ്ചം അവങ്കിട്ടെ പേശി പാരങ്കളെ!...

മം... അവന്‍ ജിദ്ദയില്‍ നിന്ന് വരുന്നവഴിയാണ്... അവിടുത്തെ പ്രോജെക്റ്റ്‌ കഴിഞ്ഞു.. ഹിന്ദിയുടെ എ.ബി.സീ.ഡി അറിയാതെ അവനെങ്ങനെ ആ ടാക്സിക്കാരനെ പറഞ്ഞു മനസ്സിലാക്കാന്‍...

ടാക്സിക്കാരനോട് സംസാരിച്ചു അക്കോമഡേഷന്‍റെ ഏകദേശം അടുത്തെത്തിച്ചു !!...ഇനി പാടാണ്... ഈ ഗലിയിലേക്ക് ഒരു പുതിയ ആള്‍ക്ക് വഴി പറഞ്ഞു കൊടുത്ത് കൊണ്ടുവരാന്‍ സാമാന്യം നല്ല രീതിയില്‍ ബുദ്ധിമുട്ടേണ്ടിവരും ...അതും ഈ പാതിരായ്ക്ക് !!..

അവരോടു ഒരു സ്ഥലത്ത് പാര്‍ക്ക് ചെയ്ത് വെയിറ്റ് ചെയ്യാന്‍ പറഞ്ഞു..

എഴുനേറ്റു ലൈറ്റ് ഇട്ടുനോക്കി... അനസ് നല്ല ഉറക്കത്തില്‍ ആണ് !!

ഒന്നിച്ചിരുന്നു സിനിമ കണ്ടിട്ട് ഞങ്ങള്‍ കിടന്നിട്ടു അധികം നേരം ആയിരുന്നില്ല...

എന്‍റെ ഉറക്കമോ പോയി...അവന്റെം കൂടി കളയണ്ട എന്ന് കരുതി വണ്ടിയുടെ ചാവിയും എടുത്ത് ഞാന്‍ ഇറങ്ങി...

അതും ഒരു ഡിസംബര്‍ മാസമായിരുന്നു...

നല്ല തണുപ്പും മഞ്ഞും !!..

വണ്ടിയുടെ ഗ്ലാസ് എല്ലാം മഞ്ഞുകൊണ്ട് മൂടിയിരുന്നതിനാല്‍ റോഡ്‌ മങ്ങിയേ കാണാമായിരുന്നുള്ളൂ.....

അവര്‍ നില്‍ക്കുന്ന സ്ഥലത്തേക്ക് ഏകദേശം രണ്ടുകിലോമീറ്റര്‍ ദൂരമേയുള്ളൂ....

ഗലിയില്നിന്നു പുറത്തുകടന്നു അവര്‍ നില്‍ക്കുന്ന റോഡിലേക്കുള്ള കട്ടിംഗ് എടുത്തു..

അല്‍പ്പം മുന്‍പോട്ടു പോയി...

പെട്ടന്നാണ് അത് കണ്ടത്...

റോഡിന്റെ ഒത്ത നടുക്ക് ...ഒരു കമ്പ് നാട്ടിവച്ചിരിക്കുന്നു.

സൂക്ഷിച്ചു ഒന്നുകൂടി നോക്കിയപ്പോ കണ്ടു.....
ആ നാട്ടിവെച്ച കമ്പിനടുപ്പുറത്തു ഒരു വലിയ കുഴി..

മഞ്ഞാല്‍ മൂടപ്പെട്ട ഫ്രണ്ട് ഗ്ലാസിലൂടെ ഞാന്‍ അത് കണ്ടുമനസ്സിലാക്കി വന്നപ്പോഴേക്കും വൈകിപ്പോയിരുന്നു !!

സഡന്‍ ബ്രേയ്ക്കിനും രക്ഷപെടുത്താനായില്ല....
നിയന്ത്രണം വിട്ടു വണ്ടി നേരെ കുഴിയിലേക്ക് !!
സാമാന്യം നല്ല സ്പീഡില്‍ വന്നിട്ട് പെട്ടന്ന് ബ്രെയ്ക്ക് ഇട്ടതു കാരണം ആവാം വണ്ടി സ്കിഡ്‌ ആയി മുന്‍വശം എങ്ങനെയോക്കെയോ കുഴിയുടെ മറുഭാഗത്തെത്തി !!

പാതി ഭാഗം കുഴിയില്‍...

ഇതിനിടയില്‍ അകത്തു സീറ്റ് ബെല്‍റ്റ്‌ ഇടാതിരുന്ന ഞാന്‍ സീറ്റില്‍ ഇരുന്നു ആടി ഉലയുന്നുണ്ടായിരുന്നു..
തല ചെന്നിടിച്ചു ഫ്രണ്ട് ഗ്ലാസ് പൊട്ടി..
സ്റ്റിയറിംഗ് വീലില്‍ ചെന്നിടിച്ചു എന്‍റെ മൂക്കും !!

വണ്ടി എങ്ങനെയൊക്കെയോ എവിടെയോ തട്ടി നിന്നു !!
അകത്തു ഞാനും !!

ആകെ ഒരു മരവിപ്പ് !!...

മൂക്കിനകത്തു കൂടി പുഴു ഇഴയുന്നത് പോലെ.... !!

അത് തൊട്ടുനോക്കി രക്തം ആണെന്ന് തിരിച്ചറിഞ്ഞപ്പോഴേക്കും എന്‍റെ ബോധം മറഞ്ഞിരുന്നു !!

          

                                                          ~~~~*~~~~

ഭാഗം 2 !!

------------

എത്രനേരം അങ്ങനെ കിടന്നു എന്നറിയില്ല...

ബോധം വരുമ്പോഴും ആരും സംഭവ സ്ഥലത്ത് എത്തിയിരുന്നില്ല...

ആ തണുപ്പത്ത് നട്ട പാതിരായ്ക്ക് ആര് വരാന്‍?..

മൂക്കില്‍ തൊട്ടു നോക്കി... ചോര സാമാന്യം നന്നായി തന്നെ പോകുന്നുണ്ട്..

ഡോര്‍ തുറക്കാന്‍ നോക്കി പറ്റുന്നില്ല...
അത് എവിടെയോ ഇടിച്ചു സ്റ്റക്ക് ആയി നില്‍ക്കുന്നു... ഒരു വിധം മറു ഭാഗത്ത്‌ കൂടി ഇറങ്ങി !!
.
വണ്ടി മൊത്തത്തില്‍ ഒന്ന് നോക്കി ..

റിപ്പയര്‍ ചെയ്യുന്നതിലും ഭേദം പുതിയത് വാങ്ങുകയാണ് നല്ലതെന്ന് തോന്നുന്നു !!

ബോഡി മുഴുവന്‍ ഡാമേജ്.
ടയര്‍ നാലും പോയി.
ഫ്രണ്ട് ഗ്ലാസ് പൊട്ടി . അവിടവിടെയായി രക്ത തുള്ളികള്‍ കാണാം.
എന്‍റെ വിലപ്പെട്ട B-ve രക്തം .

കുഴിയില്‍ ചാടിയപ്പോഴേ ബംബര്‍ ,ആക്സില്‍ ഇതിന്‍റെ ഒക്കെ കാര്യത്തില്‍ ഒരു തീരുമാനം ആയിരുന്നു.

അവിടവിടെയായി ഓയില്‍ ഒലിച്ചു കിടക്കുന്നു !!

ആകെ മൊത്തം ടോട്ടല്‍ ഒരു ആക്രിക്കടയിലെക്ക് നോക്കുന്നത് പോലെ !!

നടക്കാന്‍ നോക്കി ..
കാലുകള്‍ വേച്ചു വേച്ചു പോകുന്നു !!.

തല നേരെ നില്‍ക്കുന്നില്ല.. ഇത്തിരി വെള്ളം കിട്ടിയിരുന്നെങ്കില്‍..!!!!

കിടുകിടാ വിറയ്ക്കുന്ന തണുപ്പ് !!

കുറച്ചു നേരം അങ്ങനെ അവിടെ നിന്നപ്പോള്‍ ആ വഴി ഒരു അറബി വന്നു.

കുഴിയില്‍ കിടക്കുന്ന വണ്ടിയില്‍ ചാരി നില്‍ക്കുന്ന എന്‍റെ അവസ്ഥ കണ്ടിട്ടാവണം... അയാള്‍ വണ്ടി നിര്‍ത്തി ഓടി ഇറങ്ങി വന്നു.

ഞാന്‍ ഒരു വിധത്തില്‍ പറഞ്ഞു .

“സധീക്...മോയ”

അയാള്‍ വന്ന വേഗത്തില്‍ തിരിച്ചോടി വണ്ടിയില്‍ ഉണ്ടായിരുന്ന വെള്ളക്കുപ്പി കൊണ്ടുവന്നു തന്നു.

മടമടാന്ന് കുറെ വെള്ളം കുടിച്ചു.
മുഖം കഴുകി.
മൂക്കിലും ചിറിയിലും തൊടാന്‍ പറ്റുന്നില്ല..
പ്രാണന്‍ പോകുന്ന വേദന 

ചോര അപ്പോഴും നിലയ്ക്കാതെ പോകുന്നു..

അയാള്‍ പോലീസിനെ വിളിച്ചോന്നു ചോദിച്ചു.

ഞാന്‍ ഇല്ലാന്ന് തലയാട്ടി.

അയാള്‍ ഫോണ്‍ എടുത്തു ആംബുലന്‍സ് സര്‍വീസിനെയും പോലീസിനെയും വിളിച്ചു.

പോലീസിനെ വിളിക്കുന്ന കേട്ടപ്പോള്‍ മനസ്സില്‍ പെട്ടന്നൊരു ഇടി വെട്ടിയപോലെ...

“ എനിക്ക് ലൈസന്‍സ് ഇല്ല” !!!!

പോലീസ് വന്നാല്‍ ലൈസന്‍സ് ഇല്ലാതെ വണ്ടി ഓടിച്ചതിന് കേസും ജയില്‍ ശിക്ഷയും ഉറപ്പ്.

പോരാത്തതിന് ഇന്‍ഷുറന്‍സും കിട്ടില്ല...
കമ്പനി വണ്ടിയാണ് !!

ആക്രി പോലെ കിടക്കുന്ന വണ്ടി. അത് നന്നാക്കാന്‍ വേണ്ടിവരുന്ന ഭാരിച്ച സംഖ്യ ഓര്‍ത്തപ്പോള്‍ എന്‍റെ തല വീണ്ടും കറങ്ങി !!

ദൂരെ മാറി നിന്ന് പോലീസുകാര്‍ക്ക് ഫോണില്‍ക്കൂടി ആക്സിഡന്റ് ലൊക്കേഷന്‍ പറഞ്ഞുകൊടുത്തുകൊണ്ട് നില്‍ക്കുന്ന ആ അറബിയെ ഞാന്‍ നിസ്സഹായതയോടെ നോക്കി !!


                                                          ~~~~*~~~~


ഭാഗം 3 !!

-----------

അറബി ഫോണിലെ സംസാരം കഴിഞ്ഞതിനു ശേഷം എന്‍റെ അടുത്തേക്ക് വന്നു .

പേടിക്കാനില്ല.. ആംബുലന്‍സ് ഇപ്പൊ എത്തും . പോലീസും !!..

അയാളുടെ വാക്കുകള്‍ എന്നില്‍ വേദന മാറ്റി ഭയം എന്ന വികാരം കോരിയിട്ടു !!...

ക്രിസ്മസ് സ്പെഷ്യലായി വാങ്ങിയ വെള്ള ഷര്‍ട്ടില്‍ മൂക്കില്‍ നിന്ന് വരുന്ന രക്തം നല്ല ഭംഗിയുള്ള ചുവന്ന ഡിസൈന്‍ വരച്ചിരുന്നു.

അതിന്‍റെ ഒരു സൈഡ് കീറി ഞാന്‍ മൂക്കിലെ രക്തപ്രവാഹം തടയാന്‍ ഒരു വിഫല ശ്രമം നടത്തി.

ആ നല്ലവനായ അറബി ആ തണുപ്പത്തും എന്‍റെ കൂടെ നിന്നു. പാവം എതോ അത്യാവശ്യത്തിനു പുറത്തിറങ്ങിയതാവാം ഈ അസമയത്ത്. അതുപോലും അയാള്‍ മറന്നിരുന്നു.

ഒരു പത്തുമിനിട്ടിനുള്ളില്‍ ആംബുലന്‍സ് എത്തി !!.

ഗ്ലൂക്കോസ് കുത്തി വച്ചു. അവര്‍ സ്പിരിറ്റ്‌ പോലുള്ള എന്തോ ദ്രാവകം വെച്ച് എന്‍റെ മുഖം തുടച്ചു. പ്രാണന്‍ പോകുന്ന വേദന. എന്തൊക്കെയോ മരുന്നുകള്‍ തേച്ചു. അഞ്ചു മിനിറ്റ് കിടക്കാന്‍ പറഞ്ഞു.

ചുറ്റുമൊന്നു നോക്കി !!
ഓപ്പറേഷന്‍ റൂമില്‍ കയറിയത് പോലെ.

നമ്മുടെ നാട്ടിലെ ആംബുലന്‍സുകള്‍ മാത്രം കണ്ടിട്ടുള്ള എനിക്ക് അതൊരു പുതിയ കാഴ്ച ആയിരുന്നു. സഞ്ചരിക്കുന്ന ഒരു ആശുപത്രി.

അങ്ങനെ അപകടം നടന്നു ഏകദേശം ഒരു മണിക്കൂറിനു ശേഷം ഫസ്റ്റ് എയിഡ് കിട്ടി.

മേല്‍ ചുണ്ട് നന്നായി വീര്‍ത്തിരുന്നു. സ്റ്റിയറിങ്ങില്‍ ഇടിച്ചതാവാം.

വായ തുറക്കാന്‍ പറ്റുന്നില്ല.

വണ്ടിയില്‍ ഉണ്ടായിരുന്ന നേഴ്സ് പയ്യന്‍ മൂക്കില്‍ എന്തൊക്കെയോ ചെയ്തു.ഒരു പത്തുമിനിറ്റ് നേരത്തെ പരിശോധനയ്ക്ക് ശേഷം ഒരു കെട്ടു പഞ്ഞിയും കയ്യില്‍ തന്നു മൂന്നാഴ്ച റസ്റ്റും അവന്‍ വിധിച്ചു.

ഞാന്‍ അവര്‍ക്ക് നന്ദിയും പറഞ്ഞു പുറത്തിറങ്ങി.

എന്നെ സഹായിക്കാന്‍ അവിടെ ഉണ്ടായിരുന്ന അറബിയോട്.. പേടിക്കാനൊന്നുമില്ലെന്നും ആശുപത്രിയില്‍ പോകേണ്ട ആവശ്യമില്ലെന്നും അവര്‍ പറഞ്ഞു. മൂക്കില്‍ നിന്ന് രക്തം കുറച്ചു നേരം കൂടി പോകുമത്രേ..

അതൊക്കെ കേള്‍ക്കുന്നുണ്ടെങ്കിലും എന്‍റെ കണ്ണുകള്‍ക്ക് തകര്‍ന്നു കിടക്കുന്ന വണ്ടിയിലായിരുന്നു. പോലീസ് എത്താറായി.

പോക്കറ്റില്‍ മൊബൈല്‍ തപ്പി. കാണാനില്ല. സീറ്റില്‍ വച്ചിരുന്ന മൊബൈല്‍ ആക്സിടന്റില്‍ എവിടെയോ തെറിച്ചു പോയി കാണണം.

ആ വണ്ടിയിലേക്ക് അത് തപ്പാന്‍ ഇനി കയറുന്നത് ബുദ്ധിയല്ല.

എന്നെ കാത്ത് ടാക്സിക്കാരനോടോപ്പം നില്‍ക്കുന്ന അരുളിന്റെ മുഖം അപ്പൊ ഓര്‍മ്മ വന്നു.

ആകെ കാണാതെ അറിയാവുന്നത് അനസിന്റെ നമ്പര്‍ ആണ്.

അറബിയോട് മൊബൈല്‍ വാങ്ങി അവനെ വിളിച്ചു.

നാലാമത്തെ തവണ റിംഗ് ചെയ്തപ്പോള്‍ അവന്‍ എടുത്തു.

ഡാ... ലിബിയാണ്... നീ നിന്‍റെ വണ്ടിയെടുത്ത് സിക്സ്ത് ക്രോസ് വരെ ഒന്ന് വന്നേ...

ചുണ്ടിന്റെയും മൂക്കിന്റെയും അവസ്ഥ പരിതാപകരമായിരുന്നതിനാല്‍ ഞാന്‍ പറഞ്ഞത് അവനു ശേരിക്ക് മനസ്സിലായില്ലെങ്കിലും എന്തോ അപകടം സംഭവിച്ചെന്നു അവനു മനസ്സിലായി.

കൂടെ ഉണ്ടായിരുന്ന അറബിയോട് ഫോണില്‍ ഫ്രണ്ട് ആണെന്നും ഇത് സിക്സ്ത് ക്രോസ് ആണെന്നും ഒന്ന് പറയാന്‍ പറഞ്ഞു.

അയാള്‍ ഫോണെടുത്ത് അറബികളുടെ തനി സ്വഭാവം കാണിച്ചു. സംഭവം അങ്ങ് വിശദീകരിക്കാന്‍ തുടങ്ങി.

വണ്ടി കൊക്കയില്‍ മറിഞ്ഞു എന്നൊക്കെ തോന്നും അങ്ങേ തലയ്ക്കല്‍ നില്‍ക്കുന്നവന്.

കേട്ട പാതി കേള്‍ക്കാത്ത പാതി അനസ് വണ്ടിയുമെടുത്ത് പാഞ്ഞു വന്നു.

അവനെ കണ്ടപ്പോള്‍ നേരിയ ഒരാശ്വാസം.

എന്‍റെ മുഖത്തിന്റെ പരുക്ക് അവന്‍റെ കണ്ണുകളില്‍ ഞാന്‍ കണ്ടു.

ഡാ.... പോലീസിനെ വിളിച്ചോ....

തണുപ്പാലാണോ ഭയത്താലാണോ.... അവന്‍റെ ശബ്ദവും ഇടറുന്നുണ്ടായിരുന്നു അത് ചോദിക്കുമ്പോള്‍.

ആ അറബിച്ചന്‍ വിളിച്ചെഡാ.... അവര്‍ ഇപ്പൊ എത്തും. നീയാ അരുളിനെ ഒന്ന് വിളി. അവന്‍ എനിക്ക് വേണ്ടി വെയിറ്റ് ചെയ്ത് ആ "ക്രിസ്പി മീല്‍" ന്‍റെ മുന്‍പില്‍ ഉണ്ട്.


പറഞ്ഞു തീര്‍ന്നില്ല. ദൂരെ സൗദി പോലീസിന്റെ ഭീതി ജനിപ്പിക്കുന്ന വിവിധ വര്‍ണ്ണങ്ങളിലുള്ള ബീക്കണ്‍ ലൈറ്റ് കാണാനായി.

ആ പണ്ടാരം ഹോണും മുഴക്കി അവന്മാര്‍ വരുന്നു.

കാലനെ മുന്നില്‍ കണ്ട ശയ്യാവലംബിയായ വല്യച്ചന്‍ കൊച്ചുമക്കളെ നോക്കുന്നപോലെ ഞാന്‍ അനസിനെ നോക്കി.

അവന്‍റെ മുഖവും വിവര്‍ണ്ണമായിരുന്നു ...

                                                                 ~~~~*~~~~



ഭാഗം 4!!

-----------റോഡിന്റെ അങ്ങേ തലയ്ക്കല്‍ നിന്ന് വരുന്ന പോലീസ് വണ്ടിയെ നോക്കി അനസ് എന്നോട് ചോദിച്ചു. 

അളിയാ....ഇനി എന്ത് ചെയ്യും?.

അവനു മറുപടി കൊടുക്കാതെ ഞാന്‍ ആ അറബിച്ചന്റെ അടുത്തേക്ക് ഓടി.

അറിയാവുന്ന അറബിയില്‍ അയാളോട് പറഞ്ഞു.

ഇത്രേം നേരമായി നിങ്ങളുടെ പേര് പോലും ഞാന്‍ ചോദിച്ചില്ല. ഒരുപക്ഷേ നിങ്ങള്‍ അപ്പോള്‍ വന്നില്ലായിരുന്നെങ്കില്‍ എന്‍റെ ജീവന്‍ പോലും അപകടത്തില്‍ ആയേനെ.
ആരും കാണാതെ ഞാന്‍ ഇവിടെ കിടന്നു പോയേനെ. ഒരിക്കലും ഞാന്‍ ഈ സഹായം മറക്കില്ല.

അങ്ങ് എനിക്ക് ഒരു സഹായം കൂടി ചെയ്ത് തരണം.

ആ പോലീസുകാരോട് ഞാന്‍ ഒരു കള്ളം പറയാന്‍ പോവാണ്. അവര്‍ എന്തെങ്കിലും ചോദിച്ചാല്‍ എതിരൊന്നും പറയരുത്.. പ്ലീസ്...ഇപ്പോള്‍ ഇത് ചെയ്തില്ലെങ്കില്‍ എന്‍റെ ജീവിതം തന്നെ നാളെ മുതല്‍ മാറിമറിയും.

അയാള്‍ ഒന്നും മനസ്സിലാകാതെ എന്നെ പകച്ചു നോക്കി.
പോലീസ് വണ്ടി അപ്പോഴേക്കും അവിടെ എത്തിയിരുന്നു. അവര്‍ വണ്ടി പരിശോധിക്കുകയാണ് .

ഞാന്‍ അനസിനോട് പറഞ്ഞു. അളിയാ...കൂടെ നിന്നോണം. ഒരു അന്തം വിട്ട കളി കളിക്കാന്‍ പോവാ......

ഞാന്‍ ആ പോലീസുകാരന്റെ അടുത്തേക്ക് ചെന്നു. കൂടെ അനസും ആ അറബിച്ചനും.

അവര്‍ സംഭവം എങ്ങനെയാണ് നടന്നതെന്ന് ചോദിച്ചു.

ഞാന്‍ പറഞ്ഞു.

“ഞങ്ങള്‍ ഫൈസലിയായ്ക്ക് പോകുന്ന വഴി ആയിരുന്നു. ഇവനാണ് വണ്ടി ഓടിച്ചത്.ഞാന്‍ സൈഡില്‍ ഇരിക്കുകയായിരുന്നു. ഒരു സേഫ്ടി ബാരിക്കേഡോ.. കോണോ..ഒന്നും അവിടെ ഇല്ലായിരുന്നു. അതുകൊണ്ട് അവന്‍ അത് കണ്ടപ്പോഴേക്കും വൈകിപ്പോയി. ഭാഗ്യത്തിന് സീറ്റ് ബെല്‍റ്റ്‌ ഇട്ടിരുന്നതിനാല്‍ അവനു പരുക്കൊന്നും പറ്റിയില്ല.

പോലീസുകാരന്‍ എന്‍റെ കൂടെ ഉണ്ടായിരുന്ന അറബിയെ നോക്കി.

അയാള്‍ പറഞ്ഞു.

ഇവന്‍ പറഞ്ഞത് നേരാ... ഇന്നലെയും ഇതേ സ്ഥലത്ത് അപകടം നടന്നിരുന്നു. അവിടെ കുഴി ഉണ്ടെന്നു അറിയിക്കാനുള്ള ഒരു അടയാളവും ഇതിന്‍റെ കോണ്ട്രാക്ടര്‍ വച്ചിട്ടില്ല. തെറ്റ് ഈ പണി ഏറ്റെടുത്തു നടത്തുന്ന സിവില്‍ കോണ്ട്രാക്ടറുടെ ഭാഗത്താ. ഉടനെ ഈ ഭാഗം ശരിയാക്കിയില്ലെങ്കില്‍ ഇനിയും അപകടങ്ങള്‍ ഉണ്ടാകാം.

അയാള്‍ ഒറ്റ ശ്വാസത്തില്‍ പറഞ്ഞു നിര്‍ത്തി.

പോലീസുകാരന്‍ അനസിനോട് പറഞ്ഞു.

ജീബ് റുക്സാ , എസ്തിമാറ , തമീന്‍ .....

[ അവന്‍റെ ഡ്രൈവിംഗ് ലൈസന്‍സും വണ്ടിയുടെ രെജിസ്ട്രേഷന്‍ കാര്‍ഡും ഇന്‍ഷുറന്‍സ് കാര്‍ഡും കൊടുക്കാന്‍ ].

അതൊക്കെ അവന്‍ എടുത്തു കൊണ്ടുവന്നു കൊടുത്തു.

അയാള്‍ റിപ്പോര്‍ട്ട് തയ്യാറാക്കി.

ആ റോഡ്‌ പണി നടത്തുന്ന ഗവണ്മെന്റ് സ്ഥാപനത്തിനെതിരെയോ കോണ്ട്രാക്ട്ടര്‍ക്കെതിരെയോ ആണ് കേസ്.

വണ്ടി നന്നാക്കാന്‍ ആവശ്യമായ തുക അവരുടെ കയ്യില്‍നിന്നു ഈടാക്കി തരും ഇന്‍ഷുറന്‍സ് കമ്പനി.

ആ പോലീസുകാരന്‍ തന്നെ വണ്ടി വര്‍ക്ക് ഷോപ്പില്‍ കൊണ്ടുപോകാനുള്ള വണ്ടിക്കാരന്റെ [വിഞ്ച് ] നമ്പര്‍ തന്നു.

നാളെ വര്‍ക്ക് ഷോപ്പില്‍ നിന്ന് കിട്ടുന്ന ക്വൊട്ടേഷനുമായി ഫൈസലിയ സ്റ്റേഷനില്‍ വന്നാല്‍ മതിയെന്ന് പറഞ്ഞിട്ട് അയാള്‍ പോയി.

ഹോ !!!!!!!!!

എന്‍റെ ജീവന്‍ നേരെ വീണു.

ഞാന്‍ അനസിനെ നോക്കി.
അവന്‍ അപ്പോഴും റോബോട്ടിനെ പോലെ നില്‍ക്കുവായിരുന്നു.

അളിയാ...നിനക്ക് ഈ ബുദ്ധി ഇപ്പൊ തോന്നിയില്ലായിരുന്നെങ്കില്‍..............

അവന്‍ പറഞ്ഞു മുഴുമിപ്പിച്ചില്ല.....

അറബിച്ചന്‍ ഇടയ്ക്ക് കയറി...

കൊച്ചുകള്ളാ....ലൈസന്‍സ് ഇല്ലാതെയാ വണ്ടി കൊണ്ടോയി കുഴീല്‍ ചാടിച്ചതല്ലേ...

അയാള്‍ എന്നെ നോക്കി പൊട്ടിച്ചിരിച്ചു.

അയാളുടെ കൈ പിടിച്ചു നന്ദി പറഞ്ഞു.

അയാളുടെ സഹായം ഇല്ലായിരുന്നെങ്കില്‍ ഒരുപക്ഷെ ...................!

ഫോണ്‍ നമ്പറും തന്നു ...പോകാന്‍ നേരം അയാള്‍ പറഞ്ഞു..

ഭാഗ്യം കൂടുതല്‍ ഒന്നും സംഭവിച്ചില്ലല്ലോ... ഇനി ലൈസന്‍സ് ഇല്ലാതെ വണ്ടി ഓടിക്കരുത്.
അതിനു മറുപടി പറഞ്ഞത് അനസാണ്..

ഹേയ്... ഇനി ഇവന്‍ വണ്ടി ഓടിക്കൂല... എനിക്ക് വയ്യ ഇനീം അതിന്‍റെ പേരില്‍ പോലീസ് സ്റ്റേഷനില്‍ കയറാന്‍.

അതു കേട്ട് അയാള്‍ വീണ്ടും പൊട്ടി ചിരിച്ചു. കൂടെ ഞാനും അനസും .

അപ്പോഴേക്കും അരുളും ടാക്സിക്കാരനും എങ്ങനെയോ തേടിപ്പിടിച്ചു അവിടെ എത്തിയിരുന്നു.

അണ്ണാ .. എന്നും വിളിച്ചു അവന്‍ ഓടിവന്നു എന്നെ കെട്ടി പിടിച്ചു . കൂടെ സെന്റിയും .. അവന്‍ കാരണം ആണല്ലോ എനിക്കിത് പറ്റിയതെന്ന് !!

ഞാന്‍ അവനെ സമാധാനിപ്പിച്ചു ...

സാരമില്ലെടാ.... പുരികത്തില്‍ കൊള്ലാന്‍ ഉള്ളത് കണ്ണില്‍ കൊണ്ട് പോയെന്നു സമാധാനിക്കാല്ലോ....

ഠിം !! 

((ശുഭം ))

------------------------------------------------------------------------------------

സംഭവം കഴിഞ്ഞു ഒരു വര്‍ഷത്തോളം വീണ്ടും ലൈസന്‍സ് ഇല്ലാതെ വണ്ടി ഓടിച്ചു. ആകെ മൊത്തം ടോട്ടല്‍ രണ്ടു രണ്ടര വര്‍ഷത്തെ നിയമ ലംഘനത്തിന് ശേഷം ഈ ജനുവരി ഒന്നാം തീയതി പോയി ലൈസന്‍സ് എടുത്തു.

കാരണം ഇനി കുഴിയില്‍ ചാടുമ്പോള്‍ രക്ഷിക്കാന്‍ അനസ് ഇപ്പൊ എന്‍റെ കൂടെ ഇല്ലല്ലോ 

അളിയാ....അനൂ......... മിസ്സ്‌ യൂ 

Friday 5 July 2013

സര്‍വ്വ സൈന്യാധിപന്‍ കേരന്‍പൊതുവാളും കുന്നംകുളം യുദ്ധവും !




ആയില്യംതിരുനാള്‍ സുള്‍ഫിരാജവര്‍മ്മ മലയാളനാട്  ഭരിച്ചിരുന്ന കാലം !!


അതെ....ജനങ്ങള്‍ക്ക് വേണ്ടി എന്തും ചെയ്യാന്‍ മടിയില്ലാതിരുന്ന പ്രജാക്ഷേമതല്‍പ്പരനും അതിലുപരി  കരുണാസമ്പന്നനുമായിരുന്ന സുള്‍ഫിരാജന്‍ തന്നെ!!!!


പക്ഷെ.....അയല്‍രാജ്യമായ  തമിള്‍രാഷ്യവുമായി അത്ര നല്ല രസത്തില്‍ അല്ലായിരുന്നു നമ്മുടെ രാജന്‍ !!


കാരണം മറ്റൊന്നുമല്ല.....കന്നഡ രാഷ്യത്തെ രാജാവും ലിഫ്റ്റ്‌ ടെക്നോളജി കോഴ്സ് ക്ലാസില്‍ സുല്‍ഫിരാജന്റെ സഹപാഠിയുമായിരുന്ന മൃഗശിരസ്കന്‍ നാലാമന്‍  സനേഹത്തോടെ കനിഞ്ഞു നല്‍കിയ കുമാരധാര നദിയിലെ വെള്ളം , അങ്ങ് ദൂരെ തെങ്കാശിയില്‍ ബണ്ട് കെട്ടി വഴിതിരിച്ചു കുറ്റാലത്ത് വെള്ളച്ചാട്ടം ഉണ്ടാക്കി വിദേശനാണ്യം നേടുന്ന സെല്‍വശേഖര രാജയുടെ കൊടും ക്രൂരത!!


സെല്‍വശേഖരയുടെ ഈ കന്നംതിരിവ് കാരണം... ദുരിതത്തില്‍ ആയതു കുന്നംകുളം ഗ്രാമത്തിലെ പാവം കൃഷിക്കാരാണ് !! ഗുരുവായൂര്‍ വലിയതോടിലൂടെ പൊന്നാനിപുഴ വഴി കുന്നംകുളത്തേക്കു വഴി തിരിച്ചു വിട്ടിരുന്ന കുമാരധാര നദിയെ ആണ് സ്വാര്‍ത്ഥതാല്‍പ്പര്യങ്ങള്‍ക്കായി സെല്‍വശേഖര ബണ്ട്  കെട്ടി തടഞ്ഞത്!!


ഗ്രാമത്തിലെ ആബാലവൃദ്ധം ജനങ്ങള്‍ കൊട്ടാരത്തിലെത്തി സങ്കടമുണര്‍ത്തിച്ചു!!


സ്വന്തം റാണി ഗൂഡല്ലൂര്‍ പൂരത്തിന്‍റെ തലേന്ന് തെലുങ്കാന യുവരാജന്‍ ത്രിലോകേശന്റെ കൂടെ ഒളിച്ചോടിയപ്പോള്‍ പോലും സംയമനം പാലിച്ചു നിന്ന സുള്‍ഫിരാജന് ഇത് സഹിക്കാന്‍ ആയില്ല!!!


അതെ....സ്വന്തം രാഷ്യം ... രാഷ്യത്തെ പ്രജകള്‍.... അവരാണ് അദ്ദേഹത്തിന് സ്വകുടുംബത്തെക്കാള്‍ മുഖ്യം!!!

വിത്ത്‌ ഇമ്മീടിയറ്റ് ഇഫക്റ്റ്...സുള്‍ഫിരാജന്‍ തമിള്‍രാഷ്യവുമായി യുദ്ധം പ്രഖ്യാപിച്ചു!!

രക്തചൊരിച്ചിലുകള്‍ക്കിടയായേക്കാവുന്ന യുദ്ധങ്ങളോട് രാജന് പണ്ടേ വെറുപ്പായിരുന്നെങ്കിലും അന്നത്തിനും വെള്ളത്തിനും വേണ്ടി ചെറ്യേ ചെറ്യേ യുദ്ധങ്ങള്‍ ആവാം എന്നായിരുന്നു രാജന്റെ മതം!!


അങ്ങേ അറ്റം തന്ത്രശാലി ആയിരുന്ന ചിറയ്ക്കല്‍ പ്രവിശ്യയിലെ വലിയവീട്ടില്‍ കേരന്‍പൊതുവാള്‍ ആയിരുന്നു അന്ന് രാഷ്യ സൈന്യാധിപന്‍!!!

ഭാരത യുദ്ധചരിത്രത്തില്‍ ഇത്  'കുന്നംകുളം യുദ്ധം' എന്ന പേരില്‍ അറിയപ്പെട്ടു.


നീണ്ട ആറു ദിവസത്തെ യുദ്ധത്തിനുശേഷം സെല്‍വശേഖരരാജ മുട്ടുമടക്കി !!! അതെ നമ്മുടെ മലയാള നാട് കുന്നംകുളം യുദ്ധത്തില്‍ വിജയിച്ചിരിക്കുന്നു.


യുദ്ധത്തില്‍ ഇരുകൂട്ടര്‍ക്കും കനത്ത നാശനഷ്ടങ്ങള്‍ ഉണ്ടായെങ്കിലും പത്തനാപുരം ,പുനലൂര്‍ തുടങ്ങിയ പ്രവിശ്യകള്‍ കൂടി മലയാളനാടിനോട് കൂട്ടി ചേര്‍ക്കാനായതില്‍ സുള്‍ഫിരാജന് അഭിമാനിക്കാം.
അങ്ങനെ കുമാരധാര നദി വീണ്ടും മലയാളക്കരയിലേക്ക് ഒഴുകി തുടങ്ങി.


പത്തനംതിട്ട ,കോട്ടയം പ്രവിശ്യകളില്‍ പമ്പയാര്‍ എന്നും ,എറണാകുളം പ്രവിശ്യയില്‍ പെരിയാര്‍ എന്നും തൃശ്ശൂര്‍ പ്രവിശ്യയില്‍  പൊന്നാനിപ്പുഴ (ഭാരതപ്പുഴ) എന്നും പില്‍ക്കാലത്ത് ഈ നദി അറിയപ്പെട്ടു.


കുന്നംകുളം മലയാള നാടിന്റെ നെല്ലറയായി മാറി !!
വാണിജ്യ തലസ്ഥാനം!! 


വഴുതനങ്ങ പോലിരുന്ന മലയാളനാടിന്റെ ഭൂപടം പാവയ്ക്കാ പോലെ ആക്കാന്‍ ഈ യുദ്ധം ഒരു കാരണമായിത്തീര്‍ന്നു എന്നും പറയാം!!


തന്ത്രപരമായി യുദ്ധം നയിച്ച് മലയാളനാടിന്റെ അഭിമാനം കാത്ത സൈന്യാധിപന്‍ കേരന്‍പൊതുവാളിനോടുള്ള ആദരസൂചകമായി സുള്‍ഫിരാജന്‍ മലയാളനാടിനെ പുനര്‍നാമകരണം ചെയ്തു  “കേരളം” എന്നാക്കി!!!


അതെ.....  അന്ന് മുതലാണ്‌  നമ്മുടെ ഈ ദൈവത്തിന്റെ സ്വന്തം നാട് ‘കേരളം’ എന്ന പേരില്‍ അറിയപ്പെടാന്‍ തുടങ്ങിയതും  കുന്നംകുളം എന്ന ചെറിയ ഗ്രാമം കേരളാ ഭൂപടത്തില്‍ സ്ഥാനം പിടിച്ചതും!!!  :)
  

Thursday 6 June 2013

സര്‍ വില്‍ഫ്രെഡ് സ്ക്ലിനോയി തീവണ്ടിയാപ്പീസ്!!


കൊല്ലവര്‍ഷം 952 -ആം ആണ്ട് , ചിങ്ങം 6 !!!!

വില്‍ഫ്രെഡ് പെരേര സ്ക്ലിനോയി സായിപ്പ്  പട്ടാമ്പി കടപ്പുറത്ത് ആദ്യമായി കാലുകുത്തി!!!


വൃദ്ധയായ മാതാവിന് പനി പിടിച്ചതിനാല്‍ ഇത്തിരി കുരുമുളക് വാങ്ങാന്‍ വന്നതാണ് അദ്ദേഹം!!!


[[ കുരുമുളക് വിസ്കിയില്‍ ഇട്ടു ഒരു പിടി പിടിച്ചാല്‍ പനി  ചെക്കോസ്ലോവാക്യ കടക്കും എന്ന് വാസ്ക്കോഡ ഗാമ ഒരിക്കല്‍ കണ്ടപ്പോള്‍ പറഞ്ഞിരുന്നത്രേ!!! ]]

അന്നും കേരളത്തിന്റെ ഗതാഗത സംവിധാനങ്ങള്‍ അത്ര പുരോഗമിചിട്ടില്ലായിരുന്നു!! കുരുമുളക് കിട്ടണമെങ്കില്‍ പത്തനംതിട്ട ജില്ലയിലെ റാന്നി വരെ പോകണം!!


കടല്‍ മാര്‍ഗം പോകാന്‍ ആണെങ്കില്‍ ആലപ്പുഴ കഴിഞ്ഞാ പിന്നെ കടലില്ല!!!


കാള വണ്ടിക്ക് അങ്ങെത്തുംപോഴേക്കും സ്പെയിനില്‍ പനി പിടിച്ചിരിക്കുന്ന മാതാവിന്റെ കാര്യത്തില്‍ ഒരു തീരുമാനമാകും!!


അദ്ദേഹം അന്ന് പട്ടാമ്പി ഭരിച്ചിരുന്ന ചേര രാജാവ് സോമന്‍ പിള്ളയെ പോയി കണ്ടു... സങ്കടമുണര്‍ത്തിച്ചു!!


വില്‍ഫ്രെഡിന്‍റെ മാതൃ സ്നേഹം കണ്ടു മനസ്സലിഞ്ഞ രാജാവ് സ്വന്തം കൊട്ടാരത്തില്‍ രാജ്ഞിക്ക് പനിവരുമ്പോള്‍ ഉപയോഗിക്കാന്‍ വച്ചിരുന്ന കുരുമുളക് എടുത്തു കൊടുക്കുകയും വില്‍ഫ്രെഡ് അടുത്ത കപ്പലില്‍ തന്നെ സ്പെയിനിലേക്ക് തിരിക്കുകയും  മാതാവിന്റെ പനി മാറ്റുകയും ചെയ്തതായി   ചരിത്രകാരന്മാര്‍ രേഖപ്പെടുത്തിയിരിക്കുന്നു!!!


ഈ സംഭവം സ്പെയിനിലാകെ സന്തോഷ്‌ പണ്ടിട്ടിന്റെ പാട്ട് പോലെ പടര്‍ന്നു പിടിച്ചു!!

കേട്ടവര്‍ കേട്ടവര്‍ ആ അത്ഭുത വസ്തു [കുരുമുളക് -മെയിഡ് ഇന്‍ റാന്നി ] കാണാന്‍ വില്ഫ്രെഡിന്‍റെ വീട്ടില്‍ വരുകയും കൂട്ടത്തില്‍ സോമന്‍ രാജാവിന്റെ വിശാലമനസ്കതയെ പറ്റി കേട്ട് അത്ഭുത പരതന്ത്രര്‍ ആവുകയും ചെയ്തു!!!


കണ്ടവര്‍ കണ്ടവര്‍  വില്‍ഫ്രെഡിനോട് പറഞ്ഞു :


" ഡ്യൂട് , സോമന്‍ കിംഗ്‌ ഈസ്‌ എ വെരി ഗുഡ് പേര്‍സണ്‍ . ഇഫ്‌ ഹീ ഡിടിന്റ് ഗീവ് കുരുമുളക് , യുവര്‍ മദര്‍ വില്‍ ബീ ഇന്‍ ഹെല്‍ നൌ!

സോ ,യൂ ഹാവ് റ്റു  ടു സംതിംഗ് ഫോര്‍ ഹിസ്‌ കണ്ട്രി!! "


വില്‍ഫ്രെഡിനു ഉറക്കമില്ലാതെ ആയി !!


രാവും പകലും ചിന്തിച്ചു ചിന്തിച്ചു  അവസാനം എന്തൊക്കെയോ തീരുമാനിച്ചുറപ്പിച്ചു വീണ്ടും പട്ടാമ്പിയിലേക്ക് കപ്പല് കയറി!!


രാജ കൊട്ടാരത്തില്‍ എത്തി സോമന്‍ രാജനെ മുഖം കാണിച്ചു!!

തന്റെ മാതാവിന്റെ ജീവന്‍ രക്ഷിച്ചത് അങ്ങാണെന്നും ഇതിനു പ്രത്യുപകാരം ചെയ്തില്ലെങ്കില്‍  തനിക്ക് സമാധാനം കിട്ടില്ലെന്നും ഒക്കെ പറഞ്ഞു  ഒരു A3 പേപ്പറില്‍ വരച്ച ഒരു പ്ലാന്‍ തിരുസന്നിധിയില്‍ വച്ചു!!!


പഴേ പോളിടെക്നിക്കായ രാജാവിന് അതെന്താണെന്നു മനസ്സിലാക്കാന്‍ അധികം സമയം ഒന്നുമെടുത്തില്ല!!!


പട്ടാമ്പി മുതല്‍ തിരുവനന്തപുരം വരെ നീണ്ടു കിടക്കുന്ന ഒരു റെയില്‍വേ ലൈന്‍!!! :)


റാന്നി ഭാഗത്ത്‌ ഭാവിയില്‍ ആറന്മുള വിമാനതാവളം വരുന്നത് മുന്‍കൂട്ടി കണ്ടു കൊണ്ടാണെന്ന് തോന്നുന്നു.....വില്‍ഫ്രെഡ് തന്റെ പ്ലാനില്‍ പത്തനംതിട്ട ജില്ലയിലെ സ്റ്റേഷന്‍ തിരുവല്ലാ ഭാഗത്താണ് അടയാളപ്പെടുത്തിയിരുന്നത്!!   റാന്നിയില്‍ കുരുമുളക് വാങ്ങാന്‍ പോകുന്നവര്‍ക്ക് "തിരുവല്ല" സ്റ്റേഷനില്‍ ഇറങ്ങി പമ്പയാര്‍ വഴി ബോട്ടിന് പോകാനുള്ള പ്രത്യേക സ്കെച്ചും അതില്‍ ഉണ്ടായിരുന്നു!!


രാജാവിന്റെ മനസ്സു നിറഞ്ഞു...  കൊട്ടാരത്തിലെ കുരുമുളക് ദാരിദ്ര്യം തീരാന്‍ പോകുന്നു....മലയാള നാടിന്റെ ഇങ്ങേ  അറ്റം മുതല്‍ അങ്ങേ  അറ്റം വരെ തീവണ്ടി ഓടാന്‍ തുടങ്ങുന്നു!!!  ഇത് സ്വപ്നമോ സത്യമോ!!!


പാളം പണിയാനാവശ്യമായ ഇരുമ്പ് ചൈനയില്‍ നിന്നും ആവശ്യമായ കരിങ്കല്ല് കഷ്ണങ്ങള്‍ ഹിമാലയത്തില്‍ നിന്നും പൊട്ടിചെടുക്കാമെന്നും മന്ത്രി പുംഗവന്‍ രമേശ്‌ പി.പി  അറിയിച്ചപ്പോ പിന്നെ രാജാവൊന്നും നോക്കിയില്ല ....കുറച്ചു തമിഴന്മാരേം ഇത്തിരി ബംഗാളികളേയും വിളിച്ചു പണി തുടങ്ങി!!!


പണി അതിവേഗം ബഹുദൂരം പുരോഗമിക്കവേ......വില്‍ഫ്രെഡ് തന്‍റെ മനസ്സില്‍ അടക്കി വെച്ചിരുന്ന ആഗ്രഹം ഇത്തിരി ചമ്മലോടെ രാജാവിനോട് പറഞ്ഞു!!


അല്ലയോ സോമന്‍ രാജന്‍ ,


ഞാന്‍ ആദ്യമായി മലയാള നാട്ടില്‍ കാലുകുത്തിയ സ്ഥലം പട്ടാമ്പിയാണ്...

അതുകൊണ്ട്  കേരളത്തിലെ ആദ്യത്തെ റെയില്‍വേ സ്റ്റേഷനും പട്ടാമ്പിയില്‍ തന്നെ വേണം...അങ്ങ് എതിരൊന്നും പറയരുത് .. :)


വില്‍ഫ്രെഡ് മലയാള നാടിനു ചെയ്ത ഈ നല്ല കാര്യത്തെ ഓര്‍ത്തു രാജാവ് മറ്റൊന്നും നോക്കാതെ ആ ആഗ്രഹം സാധിച്ചു കൊടുക്കുകയും ആ സ്റ്റേഷന്           " സര്‍ വില്‍ഫ്രെഡ് സ്ക്ളിനോയി തീവണ്ടിയാപ്പീസ്" എന്ന് പേര് നല്‍ക്കുകയും ചെയ്തു!!!

അങ്ങനെ ആണത്രേ  പട്ടാമ്പി റെയില്‍വേ സ്റ്റേഷന്‍ ഉണ്ടായത്!!! 







:P  :P  :P  :P

~Li Bi ~

Sunday 2 June 2013

ശുക്രാന്‍ !!!!!

 

വെള്ളിയാഴ്ച്ച

ആഴ്ച്ചയില്‍ ആകെപ്പാടെ കിട്ടുന്ന ഒരു അവധി.... അത് സാദാ  പ്രവാസികളെപ്പോലെ അല്‍പ്പ സ്വല്‍പ്പം കറക്കവും ഷോപ്പിങ്ങും ഒക്കെയായി ഞങ്ങളും കഴിച്ചു കൂട്ടുന്നു..... ഞങ്ങള്‍ എന്ന് പറഞ്ഞാല്‍ ഞാനും സുഹൃത്ത് അനസും!!!

ഇത് ഒരു വെള്ളിയാഴ്ച്ചയുടെ കഥയാണ്‌...എന്‍റെ ജീവിതത്തില്‍ ഏറ്റവും കൂടുതല്‍ ടെന്‍ഷന്‍ അടിച്ചിട്ടുള്ള വെള്ളിയാഴ്ചയുടെ കഥ!!!! 


24/05/2013


പതിവുപോലെ ഷോപ്പിങ്ങും കറക്കവും എല്ലാം കഴിഞ്ഞപ്പോള്‍  സമയം രാത്രി പത്തു മണി!!

 പകല്‍ മുഴുവന്‍ വണ്ടി ഓടിച്ചു ക്ഷീണിതനായ അനുവിന് ചെറിയ ഒരു ആശ്വാസം കൊടുക്കാന്‍ വണ്ടി ഞാന്‍ ഡ്രൈവ് ചെയ്യുന്നു!!

 

ദമ്മാം സിറ്റിയില്‍ നിന്ന് ഏകദേശം ഇരുപതു കിലോമീറ്റര്‍ ദൂരമേ വീട്ടിലെക്കുള്ളൂ.  ശ്രീശാന്തും കോഴയും ,രഞ്ജിനിയും ക്യൂവും മലയാളി ഹൌസും സദാചാരക്കാരും എന്ന് വേണ്ട കമ്പനി ഓണര്‍ അറബിക്ക്  ജോലിക്കാരോടുള്ള ചിറ്റമ്മ നയത്തെ വരെ ചര്‍ച്ചിച്ച് ചര്‍ച്ചിച്ച് വരുന്നതിനാല്‍ ഹൈവേയില്‍ നിന്ന് വീട്ടിലേക്കു പോകാനുള്ള എക്സിറ്റ് വളരെ അടുത്തെത്തിയതിനു ശേഷമാണ് കണ്ടത്....സ്പീഡ് ട്രാക്കില്‍ നിന്ന് വന്ന അതെ വേഗതയില്‍ ഞാന്‍ എക്സിറ്റ് എടുത്തു. രണ്ടാമത്തെ ട്രാക്കില്‍ കൂടി ചീറി പാഞ്ഞു വന്നിരുന്ന ഒരു വണ്ടി സഡന്‍ ബ്രേക്കിട്ടു പാളി നില്‍ക്കുന്നതും അയാള്‍ എന്‍റെ പിന്നാലെ ചീത്ത വിളിച്ചുകൊണ്ട് വരുന്നതും കണ്ടു ഞാന്‍ അനുവിനോട് ചോദിച്ചു.

അളിയാ , എന്ത് ചെയ്യണം ?.

 

അനസ്  : ഒന്നും നോക്കണ്ട . കത്തിച്ചു വിട്ടോ .

 

കേള്‍ക്കേണ്ട താമസം മൈക്കേല്‍ ഷൂമാക്കറിനെ മനസ്സില്‍ ധ്യാനിച്ച്‌ ഞാന്‍ അഞ്ചാമത്തെ ഗിയറില്‍ വണ്ടി പായിച്ചു.

ഫോളോ ചെയ്യുന്നവന്‍ വിട്ടു തരുന്നില്ല.... ലോക്കല്‍ റോഡിലൂടെ ഓട്ട മത്സരം ഇനിയും നടത്തിയാല്‍ വണ്ടി വല്ല  മരുഭൂമിയിലും കിടക്കും എന്ന് മനസ്സിലായപ്പോള്‍ ഞാന്‍ മെല്ലെ വണ്ടി സൈഡാക്കി . പിന്നാലെ ഫോളോ ചെയ്ത വണ്ടിയും !!!

 

ഒരു ആജാനുബാഹുവായ സൗദി  വണ്ടിയില്‍ നിന്നിറങ്ങി എന്തൊക്കെയോ അലറി വിളിച്ചുകൊണ്ട് വരുന്നു.

ഞാനും അനുവും വണ്ടിയില്‍ നിന്നിറങ്ങി.

 

സോറി പറഞ്ഞാല്‍ അടി കിട്ടും എന്നുള്ള അവസ്ഥ. എങ്കിലും ഒരു സോറി പറഞ്ഞു തുടങ്ങി. ഭാഗ്യം അയാള്‍ അടിച്ചില്ല. പുള്ളിക്ക് എന്‍റെ ഇക്കാമയും (ഐ.ഡി കാര്‍ഡ്) ലൈസെന്‍സും കാണണം. ആള്‍ മിനിസ്ട്രി ജോലിക്കാരന്‍ ആണെന്നും പറഞ്ഞു ഒരു ഐ.ഡി കാര്‍ഡും കാണിച്ചു. എന്‍റെ സകല ഗ്യാസും പോയി. ലൈസെന്‍സ് ഇല്ലാതെ ആണ് വണ്ടി ഓടിച്ചതെന്നു ഈ കാലമാടനോട് ഞാന്‍ എങ്ങനെ പറയും. ഒരു വിധത്തില്‍ പറഞ്ഞൊപ്പിച്ചു.... ഫ്രണ്ടിനു  സുഖമില്ലാത്തത് കാരണം ഓടിച്ചതാണെന്നും പെട്ടന്ന് എക്സിറ്റ് എത്തിയത് കണ്ടില്ലെന്നും...


ലൈസെന്‍സ് എടുക്കാന്‍ അപേക്ഷ കൊടുത്തിട്ടേ ഉള്ളെന്നു മനസ്സിലാക്കിയപ്പോള്‍ ആളുടെ മട്ടും ഭാവവും മാറി. പോലീസിനെ വിളിക്കുമത്രേ. ഞാന്‍ വേഗം സ്പോണ്‍സറിനെ വിളിച്ചു വിവരം പറഞ്ഞു. ആള്‍ സംസാരിക്കാം എന്നേറ്റെങ്കിലും നമ്മുടെ കഥാ നായകന്‍ ഫോണ്‍ പോലും മേടിക്കാന്‍ കൂട്ടാക്കിയില്ല.... അയാള്‍ പോലീസിനെ വിളിച്ചു. അറബി അത്ര പിടിയില്ലെങ്കിലും അയാള്‍ പറഞ്ഞത് ഇതൊക്കെയാണ്.  

"ലൈസെന്‍സ് ഇല്ലാതെ സ്പീഡില്‍ വണ്ടി ഓടിച്ചു , അയാളെ കൊല്ലാന്‍ ശ്രമിച്ചു , ഇപ്പോള്‍ വെറുതെ വിട്ടാല്‍ ഇവന്‍ ആരെയെങ്കിലും കൊല്ലും.അത്രയ്ക്ക്അപകടകാരിയാണ്.ജയിലില്‍ ഇട്ടു നമ്മുടെ നാട്ടിലെ നിയമം എന്താണെന്ന് മനസ്സിലാക്കി കൊടുക്കണം ".....


ഞാന്‍ അനസിനെ നോക്കി. അവന്റെ മുഖത്ത് രക്ത ഓട്ടം ഉണ്ടായിരുന്നതിന്റെ ഒരു തെളിവ് പോലും ബാക്കി ഉണ്ടായിരുന്നില്ല!! അവന്‍ ദയനീയമായി എന്നെ നോക്കി!!


അവസാന കയ്യായി ഞാന്‍ അയാളോട് എനിക്കറിയാവുന്ന ഭാഷയില്‍ ക്ഷമ ചോദിച്ചു. എന്നെ കാത്ത് ഒരു കുടുംബം നാട്ടില്‍ കാത്തിരിക്കുന്നെന്നും വെക്കേഷന്‍ അടുത്തെന്നും പോലീസിനെ വിളിക്കരുതെന്നും കരഞ്ഞു പറഞ്ഞു നോക്കി!!


എവിടെ!!!!!  

നീ എന്നെ കൊല്ലാന്‍ നോക്കി...നിന്നെ ഞാന്‍ വെറുതെ വിടില്ല... സൗദി നിയമം എന്താണെന്ന് നീ അറിയണം. ഒരു മാസം ജയിലില്‍ കിടക്ക്‌....അപ്പോള്‍ പഠിക്കും...

[[ ഏതോ മലയാള സിനിമയില്‍ സലിം കുമാര്‍ പറയുന്ന ഡയലോഗ് ആ ടെന്‍ഷന്‍ പിടിച്ച സമയത്തും ഓര്‍മ്മയില്‍ മിന്നി മറഞ്ഞു – “സവൂദി അറേബ്യയാണ് രാജ്യം.ശരിയത്താണു കോടതി!!!! ]]


ദൂരെ നിന്നും പോലീസ് വണ്ടി വരുന്നത് കണ്ടു... ഞാന്‍ അയാളെ അവസാന പ്രതീക്ഷയില്‍ ഒന്നും നോക്കി നോക്കി.... ഒരു ഗ്രാം മനുഷ്യത്വം പോലും ആ മുഖത്ത് ഞാന്‍ കണ്ടില്ല!!!
ഞാന്‍ എനിക്ക് സംഭവിക്കാന്‍ പോകുന്ന വിധിയെ സ്വീകരിക്കാന്‍ തയ്യാറെടുത്തു...മകന്‍ നാട്ടില്‍ വരുന്നതും കാത്തിരിക്കുന്ന അമ്മ , പപ്പ, പെങ്ങള്‍ ..അങ്ങനെ നിരവധി മുഖങ്ങള്‍ കണ്മുന്നില്‍ മിന്നി മറഞ്ഞു. കയ്യിലിരുന്ന ഫോണും പണവും എല്ലാം അനസിനെ ഏല്‍പ്പിച്ചു. അത് വാങ്ങുമ്പോള്‍ അവന്റെ കൈ വിറയ്ക്കുന്നുണ്ടായിരുന്നു!!! വീട്ടില്‍ നിന്ന് ആരെങ്കിലും വിളിച്ചാല്‍ നെറ്റ് കട്ടായി കിടക്കുവാ..ശരിയായിട്ടു വിളിക്കും എന്ന് പറഞ്ഞേക്കാന്‍ അവനോടു പറഞ്ഞു... ആര്യാസ് ഹോട്ടലിലെ പ്രതിമയെപ്പോലെ അവന്‍ തലയാട്ടി!!!

പോലീസ് വാഹനം എത്തി. അറബികള്‍ തമ്മിലുള്ള കെട്ടിപ്പിടുത്തം ,ഉമ്മകൊടുക്കല്‍ എന്നിവ എല്ലാം കഴിഞ്ഞു അയാള്‍ എന്നെ ചൂണ്ടി പൊടിപ്പും തൊങ്ങലും വെച്ച് എല്ലാം വിവരിക്കുന്നു! കൊലപാതക ശ്രമത്തിനു കേസ് എടുക്കണം എന്നാണു അയാളുടെ ആവശ്യം.

പോലീസുകാര്‍ രണ്ടുപേര്‍ ഉണ്ട്. പയ്യന്മാരാണ്‌.. ഞാന്‍ എന്‍റെ ഭാഗം ന്യായീകരിച്ചു. ആക്സിടന്റ്റ് ഒന്നും പറ്റിയിട്ടില്ലെന്നും വേണമെങ്കില്‍ രണ്ടു വണ്ടികളും പരിശോധിക്കാമെന്നും ഫ്രണ്ടിനു സുഖമില്ലാത്തത് കാരണം ഓടിച്ചതാണെന്നും ലൈസെന്‍സ് ഇല്ലാതെ വണ്ടി ഓടിക്കുന്നത് സൗദി അറേബ്യയില്‍ എത്ര വല്യ കുറ്റമാണെന്ന് അറിയാമെന്നും ചെയ്തുപോയ തെറ്റില്‍  പശ്ചാത്തപിക്കുന്നെന്നും ഇനി ആവര്‍ത്തിക്കില്ലെന്നും ഒറ്റ ശ്വാസത്തില്‍ പറഞ്ഞു നിര്‍ത്തി.


അവര്‍ രണ്ടു വണ്ടിയും പരിശോധിച്ചു. ഒരു പോറല്‍ പോലും ഇല്ല.അയാള്‍ വീണ്ടും നമ്മുടെ നാടിന്റെ നിയമം എന്താണെന്ന് ആ ഇന്ത്യക്കാരനെ അറിയിച്ചു കൊടുക്കണം എന്ന ഒറ്റ പോയിന്റില്‍ കടിച്ചു തൂങ്ങുകയാണ്. പോലീസുകാര്‍ എന്തൊക്കെയോ അയാളോട് സംസാരിച്ചു  സലാം കൊടുത്ത് പറഞ്ഞയച്ചു. കാറില്‍ കയറുമ്പോള്‍ അയാളുടെ മുഖത്ത് കണ്ട സംതൃപ്തിയില്‍ നിന്ന് ഒന്ന് തീര്‍ച്ചയായിരുന്നു. ഈ വെള്ളിയാഴ്ച   എന്‍റെ ജീവിതം തന്നെ മാറ്റി മറിക്കാന്‍ പോകുന്നു!


പോലീസുകാര്‍ രണ്ടുപേരും  വണ്ടിയില്‍ കയറി ഇരുന്നു. എന്നെ അടുത്തേക്ക് വിളിപ്പിച്ചു . മറ്റെയാള്‍ (പരാതിക്കാരന്‍) വണ്ടി സ്റ്റാര്‍ട്ട്‌ ആക്കി പോകാന്‍ തയ്യാറെടുക്കുന്നു!!. ഞാന്‍ പോലീസ് വണ്ടിയുടെ അടുത്തേക്ക് ചെന്നു. ബാക്ക് സീറ്റിലേക്ക് നോക്കി. അതൊരു കൊച്ചു ജയില്‍ ആണ്. ചുറ്റും വല കെട്ടിയ ഒരു കൂട്! അതില്‍ കയറ്റിയാണ് എന്നെ ജയിലിലേക്ക്  കൊണ്ടുപോകാന്‍ തുടങ്ങുന്നത്!

എന്തും നേരിടാനുള്ള മനശക്തി ആ സമയത്തിനുള്ളില്‍ കൈ വന്നെങ്കിലും ഒരിക്കല്‍ കൂടി എന്‍റെ നിസ്സഹായാവസ്ഥ അവരോടു ഞാന്‍ പറഞ്ഞു നോക്കി. വെക്കേഷന്‍ അടുത്തിരിക്കുകയാണെന്നും കേസാക്കരുതെന്നും അപേക്ഷിച്ചു...അതൊക്കെ പറയുമ്പോള്‍ എന്‍റെ കണ്ണുകള്‍ നിറഞ്ഞിരുന്നു!!


പോലീസുകാര്‍ രണ്ടു പേരും ഒന്നും മിണ്ടുന്നില്ല. അവര്‍ പരാതിക്കാരനായ സൗദി  വണ്ടിയില്‍ കയറി പോകുന്നതും നോക്കി ഇരിക്കുകയാണ്!!


അയാളുടെ വാഹനം അകലേക്ക്‌ മറഞ്ഞപ്പോള്‍ പോലീസുകാര്‍ രണ്ടും എന്നെ നോക്കി.അതിലൊരാള്‍ പറഞ്ഞു. സൗദി അറേബ്യയില്‍ ലൈസെന്‍സ് ഇല്ലാതെ വണ്ടി ഓടിക്കുക എന്നുള്ളത് ധൈര്യം എന്നതിലുപരി മണ്ടത്തരം ആണ്. എന്തെങ്കിലും അപകടം പറ്റിയാല്‍ പിന്നെ നിനക്ക് ഇന്ത്യ കാണാം എന്നുള്ള മോഹം വേണ്ട. പിന്നെ എന്തൊക്കെയോ അയാള്‍ പറഞ്ഞു.. എല്ലാം ശരി വച്ച് കൊണ്ട് ,  എല്ലാം  നഷ്ടപ്പെട്ടവനെ പോലെ  ഞാന്‍ നിന്നു. പെട്ടന്ന് ആ പോലീസുകാരന്‍ എന്‍റെ ഐ.ഡി കാര്‍ഡ് മടക്കി തന്നിട്ട് പറഞ്ഞു.


 "കൂട്ടുകാരനോട് വണ്ടി എടുക്കാന്‍ പറ.ലൈസെന്‍സ് കിട്ടാതെ ഇനി മേലില്‍  വണ്ടി എടുക്കരുത്. നാട്ടില്‍ പോകാറായി എന്നല്ലേ പറഞ്ഞത്. ഞങ്ങളുടെ നാട്ടിലെ ജയിലില്‍ കിടക്കുക എന്ന് പറയുന്നത് അത്ര രസമുള്ള ഏര്‍പ്പാടല്ല" !!!


എനിക്ക് അയാള്‍ പറയുന്നത് വിശ്വസിക്കാന്‍ പറ്റിയില്ല.. ജീവന്‍ തിരിച്ചു കിട്ടിയത് പോലെ. ഞാന്‍ അനുവിനെ നോക്കി. അവന്റെ കണ്ണുകളും നിറഞ്ഞിരുന്നു.കൂട്ടത്തില്‍ നല്ല വെയിലത്ത്‌ പെയ്യുന്ന മഴ പോലെ ഒരു പുഞ്ചിരിയും!!!


ആ പോലീസുകാരന്റെ കയ്യില്‍ പിടിച്ചു ആദ്യമായി മനസ്സു നിറഞ്ഞു  ഞാന്‍ പറഞ്ഞു 

“ ശുക്രാന്‍!! ” (
Thank You)

പല സന്ദര്‍ഭങ്ങളില്‍ പലരോടു ആ വാക്ക് പറഞ്ഞിട്ടുണ്ടെങ്കിലും അതിന്റെ ശരിയായ അര്‍ഥം എന്താണെന്ന് എനിക്ക് മനസ്സിലാക്കി തന്നത് ഈയൊരു സംഭവമാണ്. അയാള്‍ എന്നെ ഒരു പെറ്റികേസുപോലും ചാര്‍ജ് ചെയ്യാതെ വെറുതെ വിട്ടതിനു കാരണം അങ്ങ് ദൂരെ കേരളത്തില്‍ എന്‍റെ വരവിനായി കാത്തിരിക്കുന്ന അമ്മയുടെ പ്രാര്‍ത്ഥന മാത്രമാണെന്ന് ഞാന്‍ അറിയുന്നു!!

എത്ര നന്ദി പറഞ്ഞാലും മതി വരില്ല ആ പോലീസുകാരനോട്‌.
പ്രാര്‍ഥനകളില്‍ ആ പോലീസുകാരനേയും ഞാന്‍ ഓര്‍ക്കുന്നു എന്നും!!.

അയാള്‍ക്ക്‌ ഇതൊരു ചെറിയ സംഭവം മാത്രമാവാം. പക്ഷെ എനിക്ക് തിരിച്ചു കിട്ടിയത് എന്‍റെ ജീവിതമാണ്!!!

-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-
ജയസൂര്യ ഓണ്‍ലൈന്‍ , നീലക്കുയില്‍ മീഡിയ എന്നിവര്‍ക്കൊപ്പം ചേര്‍ന്ന്
മലയാളം ബ്ലോഗേഴ്‌സ് ഗ്രൂപ്പ് ‘താങ്ക് യൂ’ എന്ന പേരില്‍  
ബ്ലോഗിംഗ് മത്സരം  സംഘടിപ്പിച്ചപ്പോള്‍ മനസ്സില്‍ തെളിഞ്ഞു വന്നത് ആ നന്മ നിറഞ്ഞ പോലീസുകാരന്റെ മുഖമാണ് . ഈ സംഭവം ഇവിടെ  കുറിച്ചിടുന്നു..അറബി അല്ലാതെ വേറൊരു ഭാഷയും അറിയാത്ത ആ പോലീസുകാരന്‍ ഇത് വായിക്കില്ല...എന്ന ഉത്തമബോധത്തോട് കൂടി!!

 

 




PS  :"താങ്ക് യൂ" എന്ന മലയാളം സിനിമയുടെ പ്രചാരണാര്‍ത്ഥം   
ജയസൂര്യ ഓണ്‍ലൈന്‍ , നീലക്കുയില്‍ മീഡിയ എന്നിവരോടൊപ്പം ചേര്‍ന്ന് മലയാളം ബ്ലോഗേഴ്സ് ഗ്രൂപ്പ്  നടത്തുന്ന മത്സരത്തിനുവേണ്ടിഎഴുതിയത് !!

ഗ്രൂപ്പിനെ പറ്റിയും "താങ്ക് യൂ" സിനിമയെ പ്പറ്റിയും കൂടുതല്‍ അറിയാന്‍ ഈ ലിങ്കുകളില്‍ ക്ലിക്ക് ചെയ്യുക-


മലയാളം ബ്ലോഗേഴ്‌സ്       


'താങ്ക് യൂ' സിനിമ